Transferimi i Erion Veliaj në burgun e Fierit është ironizuar nga ish-Presidenti Ilir Meta, ndërkohë që zhvillohej seanca e radhës gjyqësore ndaj tij dhe Monika Kryemadhi në Gjykayën e Posaçme kundër Krimit dhe Korrupsionit. “Çojini ndonjë gjë për të ngrënë Veliajt, se do e lënë edhe pa bukë këta, vetëm se kritikoi Vuçiçin”, ka qenë batuta ironike e Metës drejtuar Veliajt.
Në një sallë ku vëmendja u nda mes zhvillimeve politike të ditës dhe ngërçit të radhës ligjore, procesi u përfshi sërish nga kaosi për shkak të bojkotit të avokatëve.Pavarësisht se Apeli Administrativ kishte vendosur të pezullonte vendimin e Dhomës së Avokatisë, mbrojtësit e ish-çiftit presidencial refuzuan të merrnin pjesë, me arsyetimin se nuk kishin marrë njoftim zyrtar përmes rrugëve ligjore.
Kjo situatë la sërish në pezullim rreth 600 procese gjyqësore në mbarë vendin.Kur trupi gjykues hyri në sallë, Ilir Meta e vuri theksin te mungesa e garancive për mbrojtjen:“Fakti që mungon prokurori Kllapi nuk është shenjë e mirë. Nuk më duket e arsyeshme që e nisni gjyqin nga avokatët dhe jo nga unë, si i pandehur kryesor. Profesioni i avokatit varet thelbësisht nga DHKA-ja. Nuk është çështje mungese vullneti, por avokati im nuk mund të rrezikojë licencën… Kërkojmë që, për shkaqe dhe arsye objektive, të mbrohem vetë. Gjykata Evropiane e të Drejtave të Njeriut i ka pranuar raste të tilla.”
Në krahun tjetër, Monika Kryemadhi e cilësoi bojkotin si një shpërdorim të profesionit të avokatit, duke kërkuar vazhdimin e seancës. Ndërkohë, prokurori Arben Kraja këmbënguli në praninë e detyrueshme të një mbrojtësi për shkak të rëndësisë së akuzave, duke shkaktuar reagimin e ashpër të Kryemadhit, e cila e quajti këtë qëndrim hipokrizi dhe përmendi shkeljet e pretenduara gjatë kontrolleve dhe marrjes së provave.
Përballë këtij bllokimi, Gjykata e Posaçme u tërhoq për vendim dhe më pas vendosi të shtyjë seancën, duke caktuar avokatë kryesisht për ish-çiftin Meta-Kryemadhi.
