Partia Demokratike ka njoftuar krijimin e një grupi të posaçëm avokatësh me qëllim ofrimin e asistencës dhe mbrojtjes ligjore për studentët që shoqërohen, ndalohen ose arrestohen nga policia gjatë pjesëmarrjes në protesta.
Sipas një njoftimi zyrtar të lëshuar nga Sekretariati për Çështjet Ligjore dhe Zgjedhore i kësaj partie, grupi i juristëve do të jetë në dispozicion përgjatë 24 orëve në shtatë ditë të javës.
Subjekti opozitar bën me dije se mbrojtja ligjore do të ofrohet pranë strukturave të Policisë së Shtetit, Prokurorisë dhe Gjykatave, me synim garantimin e respektimit të të drejtave të protestuesve dhe zhvillimin e procedurave në përputhje me kuadrin ligjor në fuqi.
Ekipi i avokatëve të caktuar nga Partia Demokratike përbëhet nga Marash Logu, Eda Grimci, Adriana Kalaja dhe Franc Nuri.
